غزل
تاریخ نشر یکشنبه هشتم حوت ۱۳۹۵ – ۲۶ فبروری ۲۰۱۷ – هالند
غزل
مصطفی پسرلی
اوس په دې کلي کې هر څوک د ځان خبرې کوي
ځان ترې نه هير وي او د لوړ اسمان خبرې کوي
مخ ته مې ګوري خو مې سترګو ته کتلى نه شي
داسې سرکوزي بيا د دین ، ايمان خبرې کوي
زه ځپل شوى يم په دې چې ما ترې مينه غوښته
زخمي ګوګل مې د هغه دوران خبرې کوي
نور په خوږو خوږو کيسو د هغه نه غولیږم
اغيار په مکر د وصال ، هجران خبرې کوي
د پسرلي خوار قسمته ته به کله ويښ شې ؟
د شر لاسونه بيا د ګران ، ارزان خبرې کوي
مصطفی پسرلی
18/02/2017
تشکر از آقای پسرلی ، سروده عالیست. موفق باشید. مهدی بشیر