۲۴ ساعت

د ژوند قافله

تاریخ  نشر پنجشنبه ۱۴  دلو  ۱۳۹۵ –  دوم  فبروری  ۲۰۱۷  –  هالند

د ژوند قافله

د مولانا داکتر محمد سعید « سعید افغانی » لیکنه

ترتیب کوونکی :  برهان الدین  «  سعیدی »

دا قافله په ډیرو خطر ناک مسیر روانه  وه  او په مخ کښی ئی  ډیر خنډونه پراته وو.

هو :  کندی ،  پرښی ، ګټی ،  اغزی ، کراړی ، ماران ، لړمان ،  لیوان او د نور و ډیرو خزنده  او څیرونکو حیواناتو سره مخامخ  وه  خو د پوهی رهبری په واسطی ئی و کړل شول چی  دغه  ټول موانع  او عوائق  لری او مطلب ته د رسیدو لیاره همواره او سمه کړی .

اوس  د دی قافلی د مزل لیاره اوږده  ده او د کلو کلو بیرته پاتی کیدو موده ئی  ډیره تیره شوی  ده نوځکه پوره  ګړندی توب  ته ضرورت لری او عاقلانه او عاملانه  حرکت ورته  په کار دی .

اوس دا قافله د ډیری امیدواری سره مخامخ  ده او دا قافلی د ټولو ملګرو مرستی  او پاملرنی  ته ضرورت  لری .

دا قافله باید  د تیرو درسونو څخه عبرت  واخلی او د نوو درسونو پوره خیال  وساتی .

 دا قافله  لکه څنګه چی وی کړی شول  چی د خپلی مخی څخه موانع او خنډونه لری کړی همدا شانی ورته په کار دی چی مطلب ته درسیدو وسایل هم برابر کړی .

اوس په  دغه مرحله کښی  یو داسی ذهنیت باید ولرو چی ټول په ګډه په ټول قوت ، طاقت  او مرستی د وطن د آبادی او آرامی په لیاره کښی نه هیریدونکی هاند وباسو او د پوره اطمینان وسایل ډیر کړو .

مونږ هم انسانان یو او د انسان په ټوګه باید د پرمخ تللو قافلو څخه د عبرت درس واخلو .

په دغه مناسبت وایم :

هلته ګوره خلکو څنګه  ښه ژوند برابر کړی دی ، د خندا او هوس دنیاه ده .

هلته  د کار او کارګر د ټولو هیلو او هڅو ارمان نشته دی .

هلته اخلاقی جرائم  د محوه کیدو په حالت کښی دی ، اسباب ، علل او عوامل ئی  له مینځه تللی دی نو د اخلاقی  جرائیمو د ارتکاب لپاره ضرورت نه پاتی کیږی .

هلته د کورونو ، کالو او خوراک  سر شته برابره ده .

هلته  د روا  هوا او هوس د پوره کیدو لپاره پوره خدمت شوی دی ؛  ولږه ، بربنډ والی  نشته ، خلک نه  دولیږی څخه  مری او نه هم  د ډیره  مرسته  پړسیږی او یا ټنډیږی .  بلکه خلک  صحی  خوراک پیژنی او په صحی  ډول خپل ژوند  تنظیمولی شی .

هلته داخلی او خارجی  امنیت او اطمینان  برابر ،  د سر لوړی او افتخار د ژوند کولو لپاره  ورځ  په ورځی  مخ  په وړاندی حرکت روان  دی .

هلته نوی  اختراعات او اکتشافات  د امیدواری مراحل طی کوی او علم او فن په هر قدم کښی د انسان د آرامی  لپاره  استخدامیږی .

هلته د بشری طاقت یوه ګړی بی ځایه هدر له لاسه نه ځی ، وخت خپل قیمت لری او قیمت د منفعت په اساس سنجول کیږی .

 هلته  د ساعت تیری ټول وسایل برابر ، هر څوک د لازم کار څخه وروسته د قانونی  ساعت  تیری لپاره  د رخصتی  حق  لری او په دغو ورځو کښی  د لویو او وړو چوکیو خاوندان د خپل  حق څخه استفاده کوی . خپلو قوآ و ته  د مه او انرژی  ورکوی  ترڅو و کړی شی  چی د راتلونکو  فعالیتونو ترسره  کولو لپاره  بدنی او عقلی  تیاری ولری .

هلته هر څوک خپل  اجتماعی مسوولیت  ته پوره پام  کوی او هرچاته  د بشری اجتماعی خدمت کولو فرصت برابر دی، نو هرڅوک خپل استعدادونه په ښه توګه په کار اچوی .

باید ووایم چی :   ډیر له په خوا څخه  په نوری دنیا کښی او په خاص ډول  په خاصو ممالکو کښی د مدنیت قافله مخ په وړاندی لاړه او مونږ د ظالمانو ، بیرحمانو او مستبدانو د لاسه په کلو ، کلو  بیرته پاتی شلو !!!   زمونږ ملی  مبارزین  د پر مخ تګ د راوستو په ګناه و ځپل شول خو سره د ټولو ځپلو وی کړی شول  چه د خپل ژوند له  مخی ظالمانه ، بیرحمانه  او مستبدانه ټول خنډونه لری او د دایمی سعادت او نیکمرغی د لاس ته را وړو زمینه  برابره کړی .

هو :  اوس د خلکو له مخی ټول خنډونه پورته شول او د وطن د آبادی  او آرامی لپاره  لیاره همواره او برابره ده ، نو په دی اساس  داسی هڅه او هیله وړاندی کوم .

ای  د هڅو او هیلو طوفانه پا څه چپی  و وهه ، د پاتی کیدو په مقابل  کښی  طغیانی  شه ،  دغه ټولی شاړی او میری ، دا جږی او لوړی په همت او میړانی آبادی کړه .

ای د خلکو د کلو کلو بندو، مینو او تلوسو :

اوس دا  شرایط  برابر دی ؛ پام کوی چی بندی پاتی نشی !  نو ونڅیږی ، وښوریږی او یو زبر دست د کار او عمل شور  او ځوږ  جوړ کړی او دغه پاتی  قافله په لږه  موده  کښی تر سرحده  ورسوی .

ای د پلرو او نیکو د آرمانجنو هڅو او هیلو بچیه :

ځغرده شه ، پا څه دغه د کلو کلو تږو ورشو ته د خپل وطن د ځمکی  په سر او د ځمکی د لاندی اوبه ورسوه او ورته پورته ئی کړه ، خوړوبه ئی کړه،  طبیعی استعداد ئی  په کار واچوه ، تولیدی  مدارک او منابع  دی پوره د  استفادی وړګرځوه ،  میوی دانی او په زړه پوری حاصل ورڅخه واخله ، مدنیت ته انکشاف ورکړه ، صنعت او زراعت دی جږی مستوی ته ورسوه ، د معدنونو څخه  دی  فایده لاس ته راوله او تخنیکی  فعالیت دی د ضرورت  په اندازی وچت کړه  ، د ژوند  د هری  برخی د سمون په خوا متوجه شه  او دنیامیکی  طاقت دی په کار واچوه .

ای ارمانونو : تر څو به په ارمان کښی  پاتی کیږی ، ترڅو به انتظار باسی ، ترڅو به  په احتیاط  قدم پورته  کوی ، ترڅو به د ویری او ډار ژوند کوی ، ترڅو به په دی مساعدو شرایطو کښی هم  د خپلو پخوانیو وسواسونو د تاثیر لاندی شپی  او ورځی تیروی  او د جمود او خمود  حالت ته  به خاتمه  نه ورکوی .

ای د وطن زلمو او ځوانانو : تاسو بختوریی  چی د ستاسو  د طاقت او قدرت په  وخت کښی  د وطن د آبادی او آرامی لپاره  مساعد فرصت برابر شو ، تاسو د خجالت له ژونده خلاص شوی نو راځه  ای د انسانیت ، شرافت او کرامت هیجانه پاڅیږه  ، ښه ګړندی او په ټوپو او ترپکو مخ  په وړاندی  په دغه سمه او برابره لیار سم او برابر شه ، مه ورخطا کیږه  تر  کهکشانه پوری لیاره  درته سمه ، همواره او برابره ده .

زه  ورځه  د کار غښتلیه ځوانه مخ  په وړاندی  ورزه بی له ویری ورتلی شی او دپر مخ تللو  په مخ کښی دی د ژوند ټول  خنډونه  او اړیکی له مینځه  لاړی .  نور نو د فریب کارو د  فریب او دوکی  په لومو او د مزخرفو سیاست  مدارانو د نخرو په سیاست کښی ګیر نشی  پاتی کیدلی .

نو بیا هم  وایم :  مخ  په  وړاندی زه ، ورځه  په سی ورځه !!!   تر هغه  ورځه چی  د پوره  حیات د چینی اوبو ، آرامی او اطمینان ته ځان ورسوی او د خیر او شر په مجادله کښی په زړه پوری موفقیت لاس  ته راولی .

***

سعید افغانی

کابل ــ خیرخانه مینه

د ۱۳۵۵ هجری شمسی کال

ترتیب کوونکی :  برهان الدین  «  سعیدی »